Feronikeli në kërkim të trajnerit, këto janë dy opsionet

Pas një sezoni të dështuar, Feronikeli është në kërkim të trajnerit që do ta kthejë skuadrën te trofetë.

Pas largimit të trajnerit Afrim Tovërlani, drejtimin e klubit e mori Ramiz Dervishi, i cili në krye të klubit ishte vetëm deri në fund të kampionatit, e me skuadrën nga Drenasi përfundoi në vendin e katërt me 65 pikë.

Mirëpo, tani fillimin e edicionit të ri, ish kampioni i Superligës kërkon që ta nisë me një trajner të ri.

Sipas burimeve të KTV-së brenda klubit bëhet e ditur se dy trajnerë janë kandidat për ta udhëhequr klubin.

I pari dhe më seriozi në këtë drejtim është trajneri i mirënjohur Bylbyl Sokoli, që është preferenca e parë e “industrialistëve”. Sokoli mund t’i kthehet punës së trajnerit pasi ka qenë jashtë futbollit të Kosovës për më shumë se 1 vit.

Emri tjetër i përmendur për të marrë drejtimin e skuadrës është edhe Jeton Beqiri, i cili i është vetëofruar skuadrës nga Drenasi. Beqiri vitin e shkuar ishte për pak kohë edhe në krye të Shkëndijes së Tetovës.