Zeka “nxen” derbin, ka një premtim interesant

Njëri nga derbit më të mëdhenj në Kosovë do të zhvillohet ditën e shtunë ndërmjet Feronikelit dhe Prishtinës.

Kampioni aktual i Kosovës pret fituesin e Kupës dhe Superkupës në një ndeshje që ka zgjuar interesim mjaftë të madh në vendin tonë.

Feronikeli nuk e nisi si është më së miri këtë edicion, mirëpo ka rritur formën dhe ka grumbulluar nëntë pikë nga pesë ndeshje, duke mbetur katër pikë mbrapa Prishtinës lidere.

Sulmuesi këmbëshpejtë i Feronikelit, Mevlan Zeka ka folur rreth kësaj sfide, duke deklaruar se skuadra e tij është e përgatitur mjaftë mirë për fitore.

“Gjatë gjithë javës jemi përgatitur mjaftë mirë për këtë derbi që do të zhvillohet nesër”.

“Në këso ndeshje vendosin detaje të vogla dhe atë detaj ne do të mundohemi ta shfrytëzojmë për t’i mbajtur tri pikët në Drenas”, deklaroi Zeka për Telegrafin.

“Nesër do të luajnë dy skuadrat më të mira në futbollin kosovar. Kemi respekt për Prishtinën pasi ka skuadër të mirë me lojtarë cilësorë dhe disa me përvojë por ne kërkojmë fitore”.

Tek Feronikeli mungojnë dyshja e sulmuesve, Mendurim Hoti dhe Blerand Kurtishaj, ndërsa Zeka thotë se do të shënojë gol.

“Është një konkurrencë shumë e shëndoshë në skuadër. Kemi fond të mjaftueshëm të lojtarëve dhe më vije keq që Kurtishaj dhe Hoti nuk janë në ndeshje”.

“A duhet të presin tifozët gol nga Mevlan Zeka? Do të mundohem maksimalisht ta ndihmojë skuadrën por edhe premtoj se do të jap më të mirën nga vetja për të shënuar dhe për të fituar skuadra”, tha sulmuesi i talentuar gjakovar.

Nga pesë ndeshje të zhvilluara, Feronikeli ka fituar tri ndeshje ndërsa ka humbur dy të tjera.