Besimtarët ortodoksë kremtojnë Pashkët

Besimtarët ortodoks kremtuan festën e ringjalljes së Krishtit. Në mesnatë në te gjitha kishat ortodokse qytetarë të shumtë zhvilluan meshat e shenjta me rastin e pashkëve, që përkujtojnë ringjalljen e Krishtit pas të premtes së zezë.

Në katedralen e Kishës Ortodokse në Tiranë ishin mbledhur qindra besimtarë, të cilët ndoqën nga afër meshën e drejtuar nga kryepeshkopi Anastas Janullatos. Përmes fjalës së tij kryepeshkopi dërgoi një mesazh urimi për të gjithë besimtarët.

Besimtaret kanë ndjekur meshën me qirinj në duar duke uruar njëri-tjetrin. Ata morën nga kisha flakën e Zotit për ta çuar atë në shtëpinë e tyre për më shumë mbarësi. Simbol i kësaj feste është veza e kuqe.

Festa e pashkëve cilësohet, si një nga festat më të rëndësishme nga besimtarët ortodoksë, sepse Krishti rikthehet përsëri në jetë.Pashka është kremtimi i ringjalljes së Jezusit, e cila festohet tri ditë pas vdekjes së tij në kryq.